امين سالكو
في المغرب، أسهل حاجة ممكن تديرها هي تجلس في المقهى، وتطلب قهوة كحلة، وتبدا توزع صكوك الغفران وتخون هادا وتطالب برحيل لاخور. ساهل بزاف تهز شعار “ارحل”، ولكن الصعيب هو ملي يرحل هاداك اللي مبرزطك، شكون غادي يشد بلاصتو؟ وشنو هو المشروع اللي جايب معاه؟ واش عندو شي شيكات يخلص بيهم ولا غير الشفوي؟
هادشي بالضبط هو اللي واقع اليوم في النادي الرياضي القنيطري، أو “الكاك” اللي كبرنا معاه ومع تاريخو. ملي كتشوف الصراعات اللي دايرة هاد الأيام، كيجيك الشك واش الناس باغين يعتقو الفرقة ولا باغين غير يطيحو الرئيس حكيم دومو. المعارضة حق مشروع، وهادشي ما فيهش نقاش، والاختلاف ضروري في أي مؤسسة، ولكن ملي كيولي الخلاف التسييري حرب طاحنة الهدف ديالها هو “راس الرئيس”، وكتتنسى الفرقة ومصالحها، فهنا خاصنا نوقفو ونقولو: اللهم إن هذا منكر.
بعض الجماهير اللي كيطالبو اليوم برحيل دومو، نساو، أو تناساو، باللي تاريخ “الكاك” ما بداش نهار جا هاد السيد للرئاسة. الفرقة دازت عليها سنين كحلة، تبدلو فيها الرؤساء والمكاتب والمدربين بحال كيما كيتبدلو التقاشر، والنتيجة شنو كانت؟ طيحة خايبة لقسم الهواة، وغرق في الديون، ومشاكل ما ليها أول من آخر.
ومخصش القنيطريين ينساو نهار جا مكتب فيه أعضاء حطاتهم الجماهير واسماء زكاتهم وشنو النتيجة غرقو الفرقة في الديون ومشاو كأن شيء لم يحدث، وحتى واحد مقاليهم شحال في الساعة .
حكيم دومو ما استلمش فرقة واجدة كتلعب على الألقاب، السيد لقى “خربة” خاصها تعاود تبنى من الساس. مشاكل مالية، اختلالات إدارية، وفئات صغرى مهلوكة. ورغم ذلك، وباش نكونو منصفين ونعطيو لكل ذي حق حقه، السيد رجع الفرقة للبطولة الاحترافية (القسم الثاني) بعدما كانت في الهواة، وخلص تقريبا 80 في المائة من الديون المتراكمة. هادي أرقام ومعطيات، واللي عندو شي حساب آخر يحطو فوق الطبلة.
الجمهور ديال “حلالة بويز” جمهور كبير، وهو الرية باش كتنفس القنيطرة، وجزء لا يتجزأ من هوية النادي. ولكن المدرجات تدارت للتشجيع والدعم، ماشي باش تولي منصة لتصفية الحسابات الشخصية والسب والشتم والتشويه. النقد مزيان، والشفافية مطلوبة، ولكن ملي كيولي الضغط تدمير وتحريض دائم، راه المستفيد الأول ماشي هو “الكاك”، بل دوك اللي كيتسناو الفرقة تزيد تغرق باش يبانو هوما أبطال.
الرسالة واضحة: اللي باغي يطيح المكتب، سيدي على الراس والعين، ولكن عطينا البديل.
* شكون غادي يهز المسؤولية من بعد؟
* فين هو التمويل؟
* فين هو مشروع الفئات العمرية؟
* كيفاش غتكملو خطة تدبير الديون؟
أما باش نطيحو اللي كاين اليوم ونبقاو نتفرجو غدا، هاد الفيلم راه ديجا تفرجت فيه القنيطرة وخلصات ثمنو غالي بزاف.
المحاسبة ما كتكونش بالمعيور في الفيسبوك، ولا بتحويل المدرجات لساحة حرب. المحاسبة كتكون بالوثائق والأرقام والنتائج. وإلى كان شي خلل، خاصو يتكشف بالأدلة ماشي بالاتهامات الخاوية. وفي المقابل، حتى واحد ما عندو تفويض إلهي، ودومو براسو راه ماشي فوق النقد، ولكن النقد البناء اللي كيبني، ماشي المعاول اللي كتهدم.
الكاك ماشي ديال حكيم دومو، وماشي ديال المعارضة، وماشي ديال حتى شي فصيل. الكاك ديال القنيطريين وتاريخهم والمدينة. الرؤساء كيمشيو ويجيو، واللاعبين كيبدلو التونيات، ولكن الفرقة هي اللي كتبقى.
لذلك، كفاكم من الحروب المجانية. النادي ما بقاش قاد على استنزاف آخر. الكاك محتاج للعقلاء، محتاج لاستقرار إداري، محتاج لحكامة مالية، ومحتاج لجمهور كيضغط باش يصلح، ماشي جمهور كيتستعمل حطب في صراعات ما كتقاضاش.
اللي باغي يعارض يجيب البديل، واللي باغي يحاسب يجيب الدليل. أما الكيكاوي الحقيقي، فهو اللي كيحط مصلحة النادي فوق الجميع.
الكاك أولاً… ودومو، ومعارضوه، والجميع، كيجيو من بعد الكاك!